Oğlunun musiqi təhsili aldığını biləndə niyə ondan küsdü? | Yalçın Rzazədənin gizli qalan xatirələri

“Retro Baku” verilişinin yeni buraxılışı Xalq artisti Yalçın Rzazadənin həyat və yaradıcılığına həsr olunub.

Sənətkarın oğlu Mətin Rzazadə atasının son günlərində ağır xəstəliklə mübarizə apardığını və üç gün boyunca danışmadığını, gözlərini açmadığını bildirib. O, Xalq artistinin son nəfəsindəki duyğulu anları belə xatırlayıb:

“Üç gün danışmayan, gözünü açmayan insan son nəfəsində üç oğlu ətrafında olanda ortancıl qardaşım dedi ki, ay ata, bax oğlanların yanındadır, ətrafındadır. Həmin an atam gözünü açdı, hərəmizə ayrı-ayrılıqda baxdı və “mən necə də xoşbəxtəm” dedi. Bu onun son sözü oldu”.

Yalçın Rzazadənin vaxtilə öz atasının onun müğənni olmasına qarşı çıxdığını bildirən Mətin Rzazadə eyni taleyi özünün də yaşadığını qeyd edib. Yalçın Rzazadə övladının bu sənəti seçməsini istəmədiyi üçün Mətin Rzazadə musiqi təhsilini atasından gizli almaq məcburiyyətində qalıb.

Mətin Rzazadə Bülbül adına orta ixtisas musiqi məktəbinə anası ilə birgə gedərək daxil olduğunu və atasına bu haqda xəbər vermədiklərini deyib:

“Yalçın müəllim orada baş müəllim idi, amma xəbəri yox idi. Bir ildən sonra mənim həmin məktəbdə oxuduğumu biləndə mənzərə dəyişdi. Məndən küsdü, incidi ki, niyə bunu ondan gizlətmişik. Amma sonradan bu sənətə olan böyük həvəsimi görüb məni öz sinfinə qəbul etdi”.