"Öz hesabımıza daş tökdük ki..." | Həkəri çayına müdaxilə edilib? - Baku TV

Laçın rayonunda Həkəri çayının sahilində yerləşən restoranlardan birinin çay yatağının bir hissəsini daşlarla dolduraraq ərazini düzləşdirdiyi iddia edilir.

Məsələ ilə bağlı açıqlama verən administrator Vüsal Bəşirov bildirib ki, qeyd olunan addım çayın daşmasının qarşısını almaq məqsədilə atılıb:

“Məsələ ilə bağlı bildirmək istəyirəm ki, həmin vaxt yaz mövsümündə qarların əriməsi nəticəsində Həkəri çayında suyun səviyyəsi kəskin artmışdı. Bu səbəbdən istirahət guşələrimizin alt hissəsinin su ilə yuyulması prosesi gedirdi. Ərazini qorumaq üçün öz hesabımıza buraya bir qədər daş tökdük ki, sel divar hissəni yuyub aparmasın”.

Məsələ ilə bağlı Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətindən bildirilib ki, Həkəri çayı dağlıq ərazidən keçdiyindən hövzəsində formalaşan səth axınları, xüsusilə intensiv və normadan artıq yağıntılar nəticəsində çayda su sərfinin və səviyyəsinin əhəmiyyətli dərəcədə artması müşahidə olunur:

“Belə hava şəraitinin təsiri nəticəsində çayda suyun səviyyəsinin sürətlə yüksəlməsi, çay məcrasının ayrı-ayrı hissələrində su axınının intensivləşməsi, məcraya lil, daş, çınqıl və digər gətirmələrin daxil olması və nəticədə, çayın suötürmə qabiliyyətinin azalması səbəbindən sel və daşqın hadisələri baş verir. Aparılan məcra dərinləşdirmə işlərinin əsas məqsədi intensiv və normadan artıq yağıntılar nəticəsində Həkəri çayında su səviyyəsinin və su sərfinin kəskin artması zamanı çayın təhlükəsiz suötürmə qabiliyyətinin təmin edilməsi, sel və daşqın hadisələri nəticəsində yarana biləcək təhlükələrin və mümkün zərərin minimuma endirilməsi, habelə çay məcrasının normal hidravlik rejiminin bərpasıdır”.