“Özləri üçün təsərrüfat yaradıblar!” | Qurum “həll oldu” deyir, əhali ah-nalə çəkir

Ucarın Yuxarı Şilyan kəndinin 5 minə yaxın əhalisi illərdir ki, su problemi ilə üz-üzə qalıb.

Sakinlər Baku TV-nin qaynar xəttinə müraciət edərək aidiyyəti qurumlardan kömək istəyirlər.

“Dəfələrlə qurumlara müraciət etmişik, amma cavabsız qalıb”, ‒ sakinlərdən biri bildirib.

Başqa bir sakin isə belə deyib:

“Üç ildir ki, Qazyan kəndi bizim arxın qabağını kəsib, özləri üçün təsərrüfat yaradıblar. Köçəri quşlar da artıq susuzluğa görə kəndə gəlmir”.

Məsələ ilə bağlı Ucar Su Meliorasiya Sistemlərinin İstismarı İdarəsindən bildirilib ki, Yuxarı Şilyan kəndinin müəyyən hissəsinin suvarma təminatı Göyçay çayından qidalanan və uzunluğu 14 kilometr olan suvarma arxı vasitəsilə həyata keçirilir:

“Sözügedən arx 1700 hektar pay torpaq sahəsinə və ümumilikdə 600 nəfər su istifadəçisinə xidmət göstərir. Həmin arx vasitəsilə həm Qazyan, həm də Yuxarı Şilyan kəndlərinin pay torpaqları suvarılır. Yuxarı Şilyan kəndində yaşayan bir qrup sakin tərəfindən ərazidə aparılan müşahidələr və Sudan İstifadəedənlər Birliyi ilə Ucar Su Meliorasiya Sistemlərinin İstismarı İdarəsi əməkdaşlarının birgə monitorinqi nəticəsində arxa qanunsuz qoşulma halları aşkarlanıb.

Faktlarla bağlı mövcud normativ qaydalara əsasən mütəxəssislərin iştirakı ilə müvafiq tədbirlər görülüb, qanunsuz qoşulmalar aradan qaldırılıb və suyun verilişi yenidən tənzimlənib”.

Qurumdan problemin həll olunduğu deyilsə də, Baku TV-nin çəkilişindən bir gün sonra sakinlər heç bir tədbirin görülmədiyini bildiriblər.