Partlayan su borusu sakinlərin başına oyun açdı | Qurum niyə laqeyd yanaşır? - Baku TV

Dünyada gedən qlobal iqlim dəyişikliklərinin təsirləri Azərbaycandan da yan keçməyib.

Xüsusilə yay aylarında buxarlanmanın yağıntıdan çox olması su qıtlığını daha da dərinləşdirir. Belə bir ciddi problemin fonunda içməli suyun israf edilməsi isə haqlı narahatlıq doğurur.

Binəqədi rayonunun Gülüstan küçəsində yaşanan mənzərə də bunun bariz nümunəsidir. Sakinlərin sözlərinə görə, əraziyə yaxın hissədə bir neçə gündür içməli su borusu partlayıb. Küçəyə axan su səbəbindən yollar palçığa çevrilib, gediş-gəliş çətinləşib. Aidiyyəti qurum isə problemin həllinə laqeyd yanaşır.

“Su evlərimizin altına dolur. Evdə nəmişlik, rütubət yaranıb”, – deyə sakinlər qeyd edirlər.

Məsələ ilə bağlı İri Şəhərlərin Birləşmiş Su Təchizatı Xidmətindən Baku TV-yə bildirilib ki, su axıntısı barədə məlumat Binəqədi rayon Su İdarəsinə verilib. Ünvana briqada cəlb olunacaq, axıntının dəqiq yeri müəyyənləşdirildikdən sonra xəttin təmiri və bərpası istiqamətində işlər görüləcək.