Sakinlər öz evlərindən çıxarılır? | Qardaşoğlu əmisinin evini əlindən alır? - Baku TV

Uzun illər yaşadıqları evdən çıxarıldıqlarını iddia edən 12 nəfərdən ibarət üç ailə Baku TV-nin qaynar xəttinə müraciət edib.

Şikayətçilər bildirirlər ki, ev onların razılığı olmadan başqa şəxsin adına rəsmiləşdirilib.

Hadisə paytaxtın Binəqədi rayonu, Xutor yaşayış massivində baş verib.

Ailələrin sözlərinə görə, evin sənədləşdirilməsi ilə bağlı mübahisə səbəbindən onlar hazırda yaşayış yerlərini itirmək təhlükəsi ilə üzləşiblər.

Şikayətçi Nazim Qarayev bildirib ki, 37 il əvvəl öz zəhməti ilə torpaq alaraq ev tikib və ailəsi ilə birlikdə orada yaşayıb.

Onun sözlərinə görə, qardaşı oğlu evi xəbərsiz şəkildə öz adına rəsmiləşdirib və bu ilin iyun ayında evdən çıxmasını tələb edib.

“Öz zəhmətimlə torpaq alıb ev tikmişəm və illərdir burada yaşayıram. Qardaşım oğlu xəbərim olmadan evi öz adına rəsmiləşdirib. İyun ayında gəlib dedi ki, ev artıq mənimdir, çıx get”, – şikayətçi deyib.

Nazim Qarayevin sözlərinə görə, evin tikildiyi vaxt qardaşı oğlunun cəmi 9-10 yaşı olub. O, qonşuların da evin öz zəhməti hesabına tikildiyini təsdiqlədiklərini, bununla bağlı ərizə yazaraq imza topladıqlarını bildirib.

“Qonşuların hamısı ərizə yazdı ki, bu evi Nazim tikib, biz də ona kömək etmişik. İki dəfə belə müraciət etdik, amma xeyri olmadı. Binəqədi məhkəməsi hər dəfə necə qərar çıxarırsa, qarşı tərəfin xeyrinə olur”, – o bildirib.