Paşinyanın silahdaşından sensasiyalı açıqlama

Sosial şəbəkələrdə Nikol Paşinyanın silahdaşlarından biri olan erməni bloger Roman Baqdasaryanın Rusiyanı, Ruben Vardanyanı və “Qarabağ klanı”nı ittiham etməsinə dair yeni video yayılıb. Həmin görüntülərdə Roman həmin şəxsləri bölgədə yaşayan erməni əhalisini azərbaycanlılarla yeni qarşıdurmaya sövq etdiyini iddia edir.

Blogerin sözlərinə görə, qondarma “Qarabağ hakimiyyəti” 44 günlük müharibədəki məğlubiyyətə baxmayaraq, ermənilərin azərbaycanlılarla daima müharibə etməsini istəyir. Roman Baqdasaryan 1988-ci il Ermənistan-Azərbaycan münaqişəsindən bəhs edərkən bildirib ki, bu qarşıdurmanın səbəbkarı Rusiya olub və bu gün də Moskva Ermənistanı zəiflətmək üçün Ruben Vardanyandan, ondan əvvəl isə Köçəryandan istifadə edirdi.

Erməni fəal əlavə edib ki, əgər Ruben Vardanyanın və əlaltılarının istədikləri kimi Ermənistanla Azərbaycan arasında növbəti müharibə başlasa, hərbi əməliyyatlar cəmi 24 saat davam edəcək. Nəticədə isə Qarabağda bir nəfər belə erməni kişisi qalmayacaq, hamısı torpaq altında olacaq. Qarabağda bütün erməni qadınlar isə evsiz qalacaq.