Pensiya kapitalının hesablanma qaydası | Yeni qaydalarla bağlı bilməli olduqlarınız - Baku TV

Bir neçə gün əvvəl ölkə başçısının müvafiq sərəncamı ilə 2026-cı ilədək təyin edilmiş pensiyalar və sığortaolunanların fərdi hesabının sığorta hissəsində qeydə alınmış pensiya kapitalı məbləğləri indeksləşdirilərək artırıldı.

Əmək və Əhalinin Sosial Müdafiəsi Nazirliyinin açıqladığı məlumata görə, yeni artımla daha çox şəxsi əhatə edən yaşa görə ortaaylıq pensiya məbləği 632 manata çatır. Minimum pensiya məbləği bu göstəricidən 2 dəfəyədək azdır.

Bəs, ümumiyyətlə, yaşa görə pensiyaların məbləği necə hesablanır?

Hüquq müdafiəçisi Sahib Məmmədovun sözlərinə görə, şəxsin yaşa görə əmək pensiyası almaq hüququ üç halda yaranır: müəyyən olunmuş qədər minimum yığım kapitalı olduğu halda, ən azı 25 il sığorta stajı olduqda və 2006-cı ildən 2018-ci ilə qədər ən azı bir ay sığorta stajı olduqda, həmin şəxsə 25 il sığorta stajı bağışlanır.

“Bu ildən etibarən həmin müddət bir il-bir il azalmağa davam edəcək. Yığım kapitalı olanlar üçün 2006-cı ildən sonra yığılmış məbləğ 144-ə bölünərək bir ayın pensiyası müəyyən olunur və ödənilməyə başlanır. Hər il bu məbləğ indeksləşdirilir. Eyni zamanda şəxs əmək pensiyasından sonra işlədikdə 6 ildən sonra yığdığı yeni kapital da pensiyaya əlavə olunur. Bu yeni kapital 72-yə (6 ilə) bölünərək əmək pensiyasının üzərinə gəlir”, – deyə o əlavə edib.

Qanunvericiliyə görə, şəxsin 2006-cı ilədək iş stajı olduqda, bu müddətin hər ili üçün 306 manat pensiya kapitalı hesablanır. Məsələn, şəxsin 2006-cı il tarixədək 25 il ümumi iş stajı olduqda, bu müddət 306 manata vurulmaqla şəxsin həmin tarixədək qeydə alınmalı olan pensiya kapitalı hesablanır. Bu göstərici qanunvericiliyə uyğun olaraq, ötən müddət üzrə indeksləşdirilərək artırılır.