Qasımov Hacıəli Tovuzda son mənzilə yola salındı
Ötən ilin sentyabrında antiterror tədbirləri zamanı yaralanan və 4 aydır komada qalan hərbçimiz Bakıda müalicə aldığı klinikada şəhid olub.
Tovuz rayon Qaraxanlı kənd sakini 2002-ci il təvəllüdlü Qasımov Hacıəli Tahir oğlunun nəşi doğulub boya-başa çatdığı kəndə gətirilib, vida mərasimi keçirildikdən sonra kənd qəbiristanlığında dəfn olunub.
Şəhid hərbçimiz antiterror tədbirləri zamanı snayperdən açılan atəş nəticəsində başından güllə yarası almışdı. O, 44 günlük müharibə zamanı əkiz qardaşı ilə birlikdə döyüşlərdə iştirak edib. Hacıəli Qasımov 9 rayonun azad edilməsinə görə medallarla təltif edilib. Müharibədən sonra Xüsusi Təyinatlı Qüvvələrin nəzdində müddətdən artıq xidmət etməyə başlayıb. Sentyabrın 19-da başladılan və cəmi 24 saat davam edən lokal xarakterli antiterror tədbirləri zamanı göstərdiyi şücaətə görə üçüncü dərəcəli “Vətənə xidmətə görə” ordeni ilə təltif edilib.