"1987-ci ildə məni ermənilər İrəvanda öz evimizə qeydiyyata salmadılar" | QƏRBİ AZƏRBAYCAN XRONİKASI

“Qərbi Azərbaycan Xronikası” layihəsi çərçivəsində “Həyat Hekayəsi” verilişinin növbəti buraxılışı efirə gedib.

“Biz qışda hokkey oynamaq üçün İrəvanda küçələri sulayardıq” buraxılışı qədim İrəvan şəhər sakini Tamerlan Əliyevin həyat hekayəsinə həsr olunub.

O, uşaqlıq illərinin heç vaxt yaddan çıxmadığını, məhəllədə yay və qış vaxtlarında oynadıqları oyunları xatırladıb, xəyalından müəllimələrinin heç vaxt çıxmadığını söyləyib.

T.Əliyev və bütün Qərbi Azərbaycan torpaqlarında yaşayan azərbaycanlılar sovet hakimiyyəti dövründə İrəvandan iki-üç dəfə deportasiyaya uğrayıblar.

O, İrəvanda son deportasiya zamanı evlərini dəyişmək üçün doğma şəhərə qayıtdığını deyib:

“Bu hadisələr başlayanda evləri dəyişdirmək istəyirdik. Onda evlə məşğul olurdum və mən bununla əlaqədar İrəvana qayıtmışdım. İrəvanda qaldığım zaman babamgil də, qonşular da oradan köçməmişdilər. Gecə yatmışdıq, qonşu gəlib bizi oyatdı ki, təcili durun, sizin babanızın evinə ermənilər hücum ediblər.

O zaman evdə mən, atam və anam idi, qalanlar isə Bakıda qalırdılar. Atam məni qaçırdı, dedi ki, sən cavansan, ola bilər səni vurarlar. Həmin gün mənim yadımdan çıxmayacaq. Ondan sonra İrəvanda heç bir azərbaycanlı qalmadı”.