"Bakı Ürək Günləri" 9-cu Beynəlxalq Konqresi keçirilib

Azərbaycan Ürək və Damar Cərrahiyyəsi Cəmiyyəti tərəfindən Ümummilli Lider Heydər Əliyevin xatirəsinə həsr olunan “Bakı Ürək Günləri” 9-cu Beynəlxalq Konqresi təşkil edilib.

Konqresin keçirilməsində əsas məqsəd Azərbaycanda kardiologiya və ürək-damar cərrahiyyəsinin inkişafına töhfə vermək, tibb elminin bu sahədəki son yeniliklərini müzakirə etməkdir.

Tədbirdə dünyanın 20-dən artıq ölkəsindən 400-ə yaxın yerli və əcnəbi kardioloq və kardiocərrahın iştirakı ilə ürək-damar xəstəlikləri, onların müalicəsindəki ən aktual məsələlər müzakirə edilib.

“Bakı Ürək Günləri” 9-cu Beynəlxalq Konqresi Azərbaycan Respublikası Səhiyyə Nazirliyi tərəfindən Davamlı tibbi təhsil verən tədbir kimi tanınıb. Konqresdə çıxış üçün göndərilmiş elmi məqalələr və abstraktlar “Azərbaycan Ürək və Damar Cərrahiyyəsi” elmi jurnalında dərc ediləcək.