"Baku TV"nin müxbirindən gözlənilməz addım

Bir ildir ki, Rusiya-Ukrayna müharibəsi davam edir. Bu müddət ərzində təkcə iki ölkənin hərbçiləri, əsgərləri, könüllüləri döyüşmür. Bu savaşın görünməyən qəhrəmanları da var, hansı ki düz bir ildir əllərində mikrofon və kamera informasiya müharibəsi aparırlar. Baş verən hadisələri dəqiq və operativ şəkildə dünya ictimaiyyətinin diqqətinə çatdırırlar.

Onların sıralarında Baku TV-nin Şərqi Avropa bürosunun müxbiri Mübariz Aslanov da var. O Mübariz ki, heç nədən qorxmadan, çəkinmədən, odun-alovun içindən, sayrışan güllələrin altından, partlayan bombaların ən yaxınlığından canlı yayımlar edərək son məlumatları çatdırır, ən qaynar nöqtələrdən reportajlar hazırlayır. Həmçinin Ukrayna rəsmiləri ilə müsahibələr edir, Prezident Volodimir Zelenskinin brifinqlərində iştirak edərək suallar ünvanlayıb, cavablar alır.

Təəssüflər olsun ki, bəziləri Mübarizi dəstəkləməkdənsə, köstək olmağı seçir, onu sual verərkən rus dilində danışmaqda çətinlik çəkdiyinə görə ittiham edirdi. Baku TV-yə irad bildirirdilər ki, rus dilini bilən bir müxbiriniz yox idimi oraya göndərəsiniz?! Mübariz isə susurdu, gördüyü işlər ən layiqli cavabı olurdu, həmçinin öz üzərində işləyirdi.

Artıq o, Ukrayna Prezidentinin brifinqində Azərbaycandan yeganə jurnalist kimi iştirak edir və ən əsası Mübariz Aslanov Zelenskiyə suallarını rus yox, elə Ukrayna dilində verir.