"Bir də doğulsam, evlənmərəm" | Dubayda şirkəti olan pakistanlı bəy niyə evlənəndə işsiz qaldı?

“Arzunun vaxtı” verilişinin yeni buraxılışında pakistanlı Hassan Khanla ailə quran azərbaycanlı Əfsanə Khan evlilikləri, toy adətləri və birgə həyatlarında qarşılaşdıqları çətinliklərdən danışıblar.

Əfsanə bildirib ki, münasibətlərində qarşılıqlı inam olsa da, hər ikisi bir-birini qısqanır. Lakin ciddi mübahisələri olmur və inciklikləri uzun çəkmir.

Onun sözlərinə görə, ailəsi cehiz verməyib, çünki Hassan bütün ehtiyacları özü qarşılamaq istəyib.

Hassan isə evliliklərinin ilk dövründə maddi çətinlik çəkdiklərini, bir neçə ay işsiz qaldığını və evdə əşyaları olmadığı üçün bir müddət kafelin üstündə yatdıqlarını deyib.

Əfsanə Pakistana köçdükdən sonra yerli yeməklərə və həyat tərzinə uyğunlaşmaqda çətinlik çəkdiyini, iki ay sonra sarılıq xəstəliyinə tutulduğunu bildirib. Zamanla isə yeni mühitə öyrəşib.

Hazırda Dubayda turizm şirkəti olan Hassan ailə qurduqdan sonra işlərinin yaxşılaşdığını, aldığı avtomobil və torpaq sahəsini Əfsanənin adına rəsmiləşdirdiyini, gələcəkdə yeni şirkət açmağı planlaşdırdığını deyib.

Hassan ailə həyatlarından danışarkən ev işlərində həyat yoldaşına kömək etdiyini zarafatla dilə gətirib:

“Mən uşaqlara baxıram, yemək bişirirəm. O isə yatır”.

Hassan “Dünyaya ikinci dəfə gəlsəydin, Əfsanə ilə yenə evlənərdin?” sualına əvvəlcə zarafatla “subay yaşayardım” cavabını verib. Daha sonra isə həyat yoldaşını çox sevdiyini bildirib:

“Zarafat edirəm. Biz çox yaxşı yaşayırıq. O məni çox sevir, mən də onu”.