"Buna nə deyəcəklər?!" - Dənizin sahilində qəribə mənzərə | "Hamısı zəhərlənib" - Baku TV

Xəzər dənizinin Lənkəran sahilində son günlər müşahidə olunan mənzərə sakinlər arasında narahatlıq yaradıb.

Sahilboyu ərazilərdə xırda mazut parçalarının üzə çıxması qeydə alınıb.

“İranda müharibə başlayandan təxminən üç gün sonra bu hal müşahidə olunmağa başladı. Sahilə mazut çıxıb. Mazut həm quşların, həm heyvanların, həm də balıqların kütləvi qırılmasına səbəb olan amildir. Hazırda balıq yoxdur. Balıqlar hamısı sahildən uzaqlaşıb, zəhərlənib məhv olur”, – sakinlərdən biri bildirib.

Ekoloq Nazim Məmmədov isə qeyd edib ki, hazırda müşahidə olunan ləkənin yaranması təbii proseslərlə bağlı ola bilər:

“Qrifonlar dərin qatlarda səthə çıxan üzvi karbohidrogenlərdir. Tektonik proseslər nəticəsində laylarda boşalmalar yaranır. Süxurların aşınması və layların yerdəyişməsi zamanı həmin üzvi karbohidrogenlər dəniz səthinə çıxır. Daha sonra onlar dənizin dibində mexaniki qarışıqlarla çöküntü şəklində qalır və su axınları, eləcə də yüksək dalğaların təsiri ilə sahilə çıxır”.

Məsələ ilə bağlı Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətindən bildirilib ki, sözügedən ərazidə monitorinq aparılıb:

“Monitorinq zamanı vizual olaraq suda neft ləkələri müşahidə edilməyib, lakin dəqiq nəticələr üçün sahildən su nümunələri götürülərək analizlərin aparılması məqsədilə Xidmətin tabeliyində fəaliyyət göstərən Mərkəzi Laboratoriyaya təqdim edilib. Analiz nəticələrinin təhlilindən sonra ictimaiyyətə geniş məlumat veriləcək”.