"Dedim ki, məndən əl çək" | Fiziki məhdudiyyətli oğlan sevdiyi qızı necə qaçırtdı? - ARZUNUN VAXTI

“Arzunun vaxtı” verilişinin budəfəki qəhrəmanları Röya və Seymur cütlüyü olub.

Veriliş zamanı onlar illərlə davam edən sevgi münasibətlərindən və qarşılaşdıqları çətinliklərdən danışıblar.

Röya sevgi tarixçələrini bölüşərkən bildirib ki, Seymurla 2012-ci ildə sosial şəbəkə vasitəsilə tanış olublar. Onun sözlərinə görə, bu tanışlığın gələcəkdə ailə qurmağa səbəb olacağı ağlına belə gəlməyib.

“Özüm 1-ci qrup əliləm. Seymurun da fiziki qüsurlu olduğunu sonradan öyrəndim. Təxminən 3 il münasibətimiz davam etdi, lakin xasiyyətlərimizin uyğun gəlməməsi səbəbi ilə ayrıldıq. Daha sonra ortaq dostlarımızın vasitəsilə yenidən bir araya gəldik. Nişanlandıqdan sonra isə ailələrimizin münasibətimizə qarşı çıxması bizi birlikdə qaçmağa məcbur etdi”, – deyə Röya bildirib.

Seymur isə ayrılıqdan sonra Röyanı geri qazanmaq üçün etdiyi cəhdlərdən danışıb. O qeyd edib ki, Röyanın razılığını almaq üçün dəfələrlə səy göstərsə də, nəticə əldə edə bilməyib.

“Barışmaq üçün çox çalışdım, amma alınmadı. Buna görə də onu qısqandırmaq üçün başqa xanımla tanış olmaq məqsədilə Elgiz Əkbərin verilişinə çıxdım”, – deyə Seymur etiraf edib.