"Demədiniz ki, o uşaq haradadır?!" - 1 ildir adı məktəbdə gedir, 1 gün belə dərsdə olmayıb - Baku TV

Bir ildir məktəbə getməsə də, adı hələ də elektron sistemdə aktiv görünür.

Xəzər rayonu, Binə qəsəbə sakini Bəhruz Adiyev bildirir ki, övladı Nuray Adizadə 2025–2026-cı tədris ili üçün Suraxanı rayonu, Əmircan qəsəbəsində yerləşən 114 nömrəli tam orta məktəbin birinci sinfinə qəbul olunsa da, səhhəti ilə əlaqədar həmin məktəbdə bir gün belə təhsil almayıb.

Valideyn övladının yaşadıqları ərazi üzrə yerləşən 117 nömrəli tam orta məktəbdə təhsil almasını istəyir.

“Həkim məsləhət gördü ki, uşağı bir il məktəbə qoymayaq, müalicəsini alsın və sağlamlığı yaxşılaşsın. Bu il isə onu Binə qəsəbəsində yerləşən 117 nömrəli məktəbə qoymaq istədik. Bizə dedilər ki, uşaq artıq 114 nömrəli məktəbin şagirdi kimi sistemdə qeydiyyatdadır.

İlk olaraq uşağı 114 nömrəli məktəbdə qeydiyyatdan keçirmişdik. Mən müəlliməyə bildirdim ki, övladım həmin məktəbə gəlməyəcək və adını sistemdən çıxarsınlar. O da mənə “yaxşı” dedi. Mən də buna güvənib məsələni nəzarətdə saxlamadım. Uşağı görmədiyiniz halda jurnalda ona necə qiymət yazırsınız? Doqquz ay ərzində niyə maraqlanmayıblar ki, bu şagird haradadır, niyə dərsə gəlmir?”, – valideyn deyib.

Məsələ ilə bağlı 114 nömrəli tam orta məktəbdən bildirilib ki, 2025–2026-cı tədris ili üçün Nuray Adizadənin birinci sinfə qəbulu ilə bağlı sorğu valideyn tərəfindən elektron sistem üzərindən yerləşdirilib. Lakin şagird tədris ili ərzində dərslərdə iştirak etməyib.

Məktəbdən verilən məlumata görə, valideyn tərəfindən övladının təhsilini davam etdirməyəcəyi və ya məktəbdən xaric olunması ilə bağlı rəhbərliyə hər hansı yazılı müraciət təqdim edilməyib. Buna görə də şagird üzrsüz səbəbdən dərslərdə iştirak etmədiyindən sinifdə saxlanılıb.

Qeyd olunub ki, valideyn 2026–2027-ci tədris ilində şagird yerdəyişməsi sistemi vasitəsilə övladını digər ümumtəhsil müəssisəsinin müvafiq sinfinə köçürə bilər.