"Dəniz təməl komando kursu”nun növbəti buraxılış mərasimi keçirilib

Hərbi Dəniz Qüvvələrinin “N” saylı hərbi hissəsində “Dəniz təməl komando kursu”nun növbəti buraxılış mərasimi keçirilib.

Tədbirdə Hərbi Dəniz Qüvvələrinin rəhbər heyəti, hərbi qulluqçular iştirak ediblər.

Hərbi Dəniz Qüvvələri komandanı vəzifəsini müvəqqəti icra edən 1-ci dərəcəli kapitan Şahin Məmmədov çıxış edərək kursu müvəffəqiyyətlə bitirənlərə Müdafiə Nazirliyi rəhbərliyinin təbriklərini çatdırıb, onlara gələcək xidmətlərində uğurlar arzulayıb.

Şahin Məmmədov ümummilli lider Heydər Əliyevin nizami ordu kimi formalaşdırdığı Azərbaycan Ordusunda Silahlı Qüvvələrin Ali Baş Komandanı İlham Əliyevin rəhbərliyi ilə aparılan uğurlu islahatlardan, HDQ-nin fəaliyyətindən, 44 günlük Vətən müharibəsində qazanılan tarixi Zəfərdə HDQ-nin şəxsi heyətinin də rəşadətlə iştirak etməsindən danışıb.

Sonra kurs birincisi tərəfindən rəmzi yaş kötüyünə emblem vurulub və məzunlara sertifikatlar təqdim edilib.

Kursda fərqlənən hərbi qulluqçular və təlimatçılar fəxri fərman və qiymətli hədiyyələrlə mükafatlandırılıblar.