"Diprospan" müəmmasına aydınlıq gətirildi

İsveçrə istehsalı olan “Diprospan” dərman vasitəsinin bəzi seriyaları geri çağırılıb. Bu barədə Analitik Ekspertiza Mərkəzindən məlumat verilib.

Bildirilib ki, U038559 seriyalı, son istifadə tarixi 10-cu ay 2023-cü il, W002245 seriyalı, son istifadə tarixi 11-ci ay 2023-cü il, W009991 seriyalı, son istifadə tarixi 1-ci ay, 2024-cü il, W015391 seriyalı, son istifadə tarixi 3-cü ay 2024-cü il, W025079 seriyalı, son istifadə tarixi 6-cı ay 2024-cü il və W033463 seriyalı, son istifadə tarixi 8-ci ay 2024-cü il olmaqla 1 milli qramlıq şüşə ampulalarda, plastik qablaşmada, karton qutuda olan dərman vasitələri satışdan çıxarılıb.

Qurumdan bu açıqlama bir neçə gündür verilsə də, əksər apteklərdə “Diprospan” hələ də satılır. Bu isə ictimaiyyət arasında müəyyən suallar doğurur. Sözügedən dərman vasitəsi hansı səbəbdən geri çağırılıb? Əgər satışdan çıxarılıbsa, niyə hələ də apteklərdən yığışdırılmayıb?

Bütün bu suallara Analitik Ekspertiza Mərkəzinin ictimaiyyətlə əlaqələr və kommunikasiya şöbəsinin müdiri Mətin Məcidli aydınlıq gətirib. O bildirib ki, “Diprospan” dərmanının satışının qadağan olunması barədə məlumat həqiqəti əks etdirmir.

Qurum rəsmisi onu da qeyd edib ki, dərman vasitəsi şəxsin həyat və sağlamlığına təhlükə yaratmayan, yəni ilkin və ikincili qablaşdırma qüsurları, həmçinin istifadə təlimatında olan texniki səhvlərə görə geri çağırılıb.