"Subay qızlar bunu edir, heç kimlə danışmadan..." | Su çərşənbəsinin qədim adət-ənənələri - Baku TV

Novruzun ilk müjdəçisi su çərşənbəsidir. Bu çərşənbəni el dilində əzəl çərşənbə də adlandırırlar.

Ölkəmizin dörd bir tərəfində olduğu kimi, Lənkəranda da su çərşənbəsi qədim adət-ənənəyə uyğun şəkildə qeyd edilir. Su hövzələrində abadlıq işləri görülür. Hələ günəş doğmamış hamı axar su başına gəlir. Suya arzu və niyyətləri söyləyirlər.

Sakin Şahnaz Rzayeva Baku TV-yə su çərşənbəsində həyata keçirilən adətlərdən danışarkən deyib:

“İlk növbədə evlərdə abadlıq, təmizlik işləri görülür və su ilə bütün evlər yuyulur. Süfrəyə su qoyulur ki, evdəkilərin həyatı ilboyu su kimi aydın olsun. Uzaq səfərə gedənlərin dalınca su səpilir. Su süfrəyə dağılanda deyilir ki, su aydınlıqdır”.

Samirə Ağayeva isə Noruz bayramının digər ənənələrindən biri – subay qızlar arasında məşhur olan üzük falından söz açıb:

“İnanca görə, səhər tezdən – hələ gün doğmamış subay qızlar su başına gəlməlidirlər. O sudan götürüb yolboyu kimsə ilə danışmadan evə aparmalıdırlar. Həmin suya “lal su” deyirlər. Axşam isə qızlar bir araya yığışırlar. Nişanlı qızın üzüyünü götürüb, bir saç telinə keçirirlər. Daha sonra onu kasa, yaxud stəkandakı suya üç dəfə batırıb-çıxarırlar. Üzük fırlanmağa başlayır və qabın divarlarına dəyir. Neçə dəfə dəyirsə, deməli, həmin qız o yaşada ailə quracaq”.