Riskli ərazi: avtobus zolağının bu hissəsi sürətlənmə zolağına çevrilməlidir? - NECƏ OLMALIDIR?

“Necə olmalıdır?” rubikasının yeni buraxılışında Atatürk prospekti ilə Həsən Əliyev küçəsinin kəsişməsində yaşanan problem barədə məlumat verilib.

Bildirilib ki, adıçəkilən küçədən gələn avtomobillər 1.11 xəttinin tələbinə uyğun olaraq birbaşa “Gənclik” metro stansiyası tərəfdən gələn nəqliyyat vasitələrinin hərəkət zolağına çıxmalıdır. Bu isə həm avtobusların qarşısını kəsmək deməkdir, həm də qəza şəraitinin yaranmasına səbəb olur.

Bildirilib ki, Atatürk prospektindən sağa — Həsən Əliyev küçəsinə dönmək istəyən sürücülər də eyni qaydada kəskin şəkildə sağa dönməyə məcbur olurlar.

Yaxşı olardı ki, prospektə çıxışda ictimai nəqliyyat zolağının heç bir əhəmiyyət daşımayan bu kiçik hissəsi avtomobillər üçün sürətlənmə zolağı kimi müəyyən edilsin. Yəni avtomobillər qaydanı pozmadan, qanunun icazə verdiyi şəkildə soldan gələn nəqliyyat axınına məhz bu zolaq vasitəsilə qoşulsunlar.

Digər tərəfdə də 1.11 xəttinin daha əvvəldən çəkilməsinə ehtiyac var.