Sağlamlıq üçün ciddi təhlükə | Bakteriya hansı xəstəliklərə yol açır?

Alimlər Ukraynada geniş spektrli antibiotiklərə davamlı olan “hiperpatogen” bakteriyaların artımı ilə bağlı həyəcan təbili çalıblar.

İsveçli alimlər Ukraynada müharibə zamanı yaralanmış 150 insandan götürülmüş nümunələri təhlil ediblər.

Nəticələr göstərir ki, bu nümunələrdə geniş spektrli antibiotiklərə davamlı olan bir sıra bakteriya ştamları mövcuddur. Tədqiqatçılar əsas diqqəti xüsusilə təhlükəli hesab edilən “Klebsiella pneumonia” bakteriyasına yönəldiblər.

O, sətəlcəm, sidik yolları, dəri və yara infeksiyaları da daxil olmaqla bir çox xəstəliklərə səbəb olur. Bu bakteriya antibiotiklərə davamlı olan infeksiyalar nəticəsində baş verən ölümlərin təxminən 20 faizinin əsas səbəbi hesab olunur.

Tədqiqatçılar dərmana davamlı bakteriyaya yoluxmuş 37 xəstədən götürülən nümunələri genom səviyyəsində təhlil ediblər. Məlum olub ki, bütün bakteriyalar antibiotik müqavimətini təmin edən genləri daşıyır. Bu da bakteriyaların həm davamlı, həm də aqressiv olmasına şərait yaradır.

Alimlər beynəlxalq ictimaiyyəti bununla bağlı təcili tədbirlər görməyə çağırırlar.