Sakinlərin gününü qara edən hadisənin səbəbi nədir? - Asfalt dağılır, hər yeri su basır! - Baku TV

Binəqədi rayonu, 1-ci Mədən yolu, 7-ci korpus Söyüdlər Məhəlləsi adlanan ərazidəki vəziyyətlə bağlı Baku TV-nin qaynar xəttinə şikayət daxil olub.

Şikayətçilərin sözlərinə görə, ərazidə hərəkət edən ağırtonnajlı yük maşınları yolu yararsız hala salıb, nəticədə asfalt örtüyü dağılıb və yolda çuxurlar yaranıb.

Məlumata görə, yük maşınlarının hərəkəti zamanı su xətləri də zədələnib ki, bu da tez-tez su sızmalarına səbəb olur. Nəticədə yolları və həyətləri su basır.

“Pəncərələrimizi aça bilmirik, toz-torpaq evin içinə dolur. Yük maşınlarının əlindən yaşaya bilmirik. Qışda palçıq, yayda da toz-torpaq”, – deyə şikayətçilərdən biri qeyd edib.

Məsələ ilə bağlı Baş Dövlət Yol Polis İdarəsindən bildirilib ki, sözügedən ərazidə Binəqədi Rayon Dövlət Yol Polis İdarəsinin əməkdaşları tərəfindən mütəmadi olaraq nəzarət-profilaktik tədbirlər həyata keçirilir. Yükdaşıma qaydalarını pozan sürücülər aşkar edilərək barələrində qanunamüvafiq tədbirlər görülür.

Binəqədi Rayon İcra Hakimiyyətindən isə bildirilib ki, məsələ ilə bağlı aidiyyəti qurumlara müraciət olunub:

“8 tondan artıq yük avtomobillərinin səhər saat 07:00-dan axşam 22:00-dək, yanacaqdaşıyan yük avtomobillərinin isə səhər saat 06:00-dan gecə saat 00:00-dək Bakı şəhərinə girişi və şəhərdaxili hərəkətinin qadağan edilməsi nəzərdə tutulub”.