Separatçılardan təxribat: sülhməramlılar atəşə tutulub

Sentyabrın 20-də qanunsuz erməni silahlıları Rusiyanın sülhməramlı kontingentinə məxsus avtomobili atəşə tutub, bir əsgər ölüb, biri yaralanıb.

Bu barədə Baş Prokurorluğun Mətbuat Xidmətindən bildirilib.

Məlumata görə, sentyabrın 20-də Azərbaycanın Tərtər rayonunun Canyataq kəndi ərazisində sülhməramlılara məxsus “KamAZ” markalı avtomobil qanunsuz erməni silahlı birləşmələrinin naməlum üzvləri tərəfindən odlu silahlarla atəşə tutulub. Hadisə nəticəsində sülhməramlı kontingentin bir əsgəri ölüb, bir nəfər hərbi qulluqçu isə yaralanıb.

Bundan başqa məlumatda deyilir ki, sentyabrın 20-də Azərbaycanın Tərtər rayonunun Canyataq kəndi ərazisində lokal xarakterli antiterror tədbirlərində iştirak edən Azərbaycan Silahlı Qüvvələrinin bir qrup hərbi qulluqçusu tərəfindən mürəkkəb relyef və dumanlı, yağışlı hava şəraiti səbəbindən qanunsuz erməni silahlı birləşmələrinə məxsus olduğu zənn edilərək Rusiya sülhməramlı kontingentinin həmin əraziyə dislokasiya olunmuş hərbi qulluqçularının olduğu avtomobil odlu silahlarla atəşə tutulub. Hadisə nəticəsində 5 nəfər rusiyalı hərbi qulluqçu həlak olub.