Şərabçı Fərid Pənahov "Bordo şərablarının Azərbaycanda səfiri" adını qazandı

Fransanın ən qədim tədbirlərindən biri, şərab qardaşlığının fəxri komandirinin növbəti yığıncağı Çiğu qalasında baş tutub.

Qeyd edək ki, bu təşkilatın 315 üzvü var və Fransanın fərqli şəhərlərində toplanırlar.

Bu təşkilata yeni üzvlərin qəbul olunması ilə bağlı ölkənin Bordo vilayətində yerləşən möhtəşəm şatoda tədbir keçirilir. Bununla da yeni üzvlər Fransa şərablarının ölkəsində nümayəndəsi olma hüququ qazanır, o cümlədən qızıl medal və diplomla təltif olunur. Şərabçı Fərid Pənahov da Bordo şərablarının Azərbaycanda səfiri adını qazanıb.

“Fəridi yanımda gördüyüm üçün çox şadam. Mən “Vintex” şirkətinin rəhbəriyəm, biz Bordoda yerləşirik. Fərid mənim dostumdur, o, Azərbaycanda ilk insandır ki, Bordonun səfiri adını qazandı. Bu, möhtəşəm gecədir, möhtəşəm şərabların dadına baxdıq. Gözəl anlar yaşadıq”, – “Vintex” şirkətinin rəhbəri Filip Larç deyib.

Tədbirdə 1000-dən çox sahibkar, tanınmış simalar iştirak ediblər. Təşkilatın nümayəndələri milli geyimlərdə qonaqları qarşılayıb, taclanma mərasimindən sonra onlar özəl şam yeməyinə dəvət ediliblər.