Şikayətçidən qalmaqallı iddia | Bu yolda işığın olmamasının əsl səbəbi nədir? - Baku TV

Son illərdə istifadəyə verilən Böyük Şor–Pirşağı avtomobil yolundan Bakının bir sıra kənd və qəsəbələrinə hərəkət edən sürücülər geniş istifadə edirlər.

Baku TV-nin qaynar xəttinə sürücülərdən birinin göndərdiyi görüntülərdə yolun bəzi hissələrində işıqlandırmanın işləmədiyi görünür. Sürücünün iddiasına görə, radar qurğusuna təxminən 200 metr qalanadək işıq dirəkləri işləsə də, radara yaxın hissədə işıqlar sönür.

Ərazidə aparılan müşahidə zamanı yolun həmin hissəsində radarın ətrafında işıqların yanmadığı təsdiqlənib. Avtomobillə yolun digər istiqamətində hərəkət zamanı daha bir radarın ətrafında da eyni vəziyyət qeydə alınıb.

Məsələ ilə bağlı Azərbaycan Avtomobil Yolları Dövlət Agentliyindən bildirilib ki, Böyük Şor–Pirşağı avtomobil yolunun işıqlandırma sisteminin müəyyən hissələrində texniki nasazlıq yaranıb. Hazırda nasazlığın aradan qaldırılması istiqamətində işlər həyata keçirilir. İşlər yekunlaşdıqdan sonra yol boyunca işıqlandırmanın tam təmin ediləcəyi qeyd edilib.