Soltanlıda aparılan tikinti-quruculuq işləri sürətlə davam etdirilir - Baku TV

Cəbrayıl rayonunda yenidən qurulan yaşayış məntəqələrindən biri də Soltanlı kəndidir.

İşğal dövründə tamamilə dağıdılan, uzun illər qaranlığa və sükuta qərq olan kənddə Azərbaycan Ordusunun 44 günlük Vətən müharibəsində qazandığı tarixi Zəfərdən sonra həyat yenidən canlanır.

“Araz Vadisi İqtisadi Zonası”nın yaxınlığında yerləşən Soltanlı kəndi gələcəkdə əhalinin məşğulluğunun təmin edilməsi baxımından əlverişli mövqeyə malikdir. Eyni zamanda Zəngəzur dəhlizinin tərkib hissəsi hesab olunan Horadiz–Ağbənd dəmir yolu və avtomobil yolunun kəndin yaxınlığından keçməsi yaşayış məntəqəsinin strateji əhəmiyyətini artırır, onun gələcək inkişafı üçün geniş imkanlar yaradır.

Soltanlı kəndinin təməlqoyma mərasimi 2023-cü il noyabrın 24-də keçirilib. Hazırda kəndin yenidən qurulması “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində davam etdirilir.

Müasir şəhərsalma prinsiplərinə uyğun şəkildə inşa olunan Soltanlı yalnız yeni fərdi yaşayış evlərinin tikildiyi kənd deyil. Burada müasir sosial infrastrukturun yaradılması, iqtisadi imkanların genişləndirilməsi və sakinlər üçün rahat yaşayış mühitinin formalaşdırılması nəzərdə tutulur. Soltanlı gələcəkdə regionun nümunəvi yaşayış məntəqələrindən birinə çevriləcək.