Sürücülər arasında qeyri-rəsmi anlaşmalar mübahisəyə səbəb olur | Hüquqşünasdan açıqlama - Baku TV

Yol-nəqliyyat hadisəsi zamanı bəzi sürücülər məsələni polisə və sığorta şirkətlərinə bildirmədən öz aralarında həll etməyə çalışırlar. Belə vəziyyətlərdə tərəflərdən birinin "nə xərcin varsa, qarşılayacağam" deyərək hadisə yerindən uzaqlaşması sonradan zərərçəkəni çətin vəziyyətə salır. Çünki hadisə yerindən uzaqlaşdıqdan sonra sübut toplamaq və prosesi rəsmiləşdirmək bəzən mümkün olmur.

Razim Kərimov da belə hallardan birinin qurbanı olub. Onun sözlərinə görə, martın 6-da Binə qəsəbəsində yolu keçmək istəyərkən "Toyota" markalı avtomobil onu vurub. Sürücü və yaxınları məsələni öz aralarında həll etməyi təklif ediblər. R.Kərimov qarşı tərəfin sözünə inanaraq razılıq verib. Ancaq verilən vədlər yerinə yetirilməyib.

"Xəstəxanada ayılarkən ayağımın ağır dərəcədə zədələndiyini, sümüklərin əzildiyini gördüm. Əvvəllər başqa xəstəliklərə görə bir neçə dəfə narkoz aldığım üçün həkimlər mənə yenidən narkoz verilməsini məsləhət görmədilər. Ayağım bir ay gipsdə qaldıqdan sonra açıldı, lakin həkimlər əməliyyatın vacib olduğunu dedilər. Hadisəni törədən şəxs isə bir dəfə belə gəlib mənə baş çəkmədi, üzr istəmədi", – deyə Razim Kərimov bildirib.

Məsələ ilə bağlı Daxili İşlər Nazirliyindən (DİN) qeyd olunub ki, faktla bağlı araşdırma aparılır:

"Tərəflərin ərizə və izahatları alınıb, hadisə yerinə baxış keçirilib. Digər sübutlar da toplanılaraq fakt üzrə açılmış cinayət işinə əlavə olunub. Xəsarətlərin dərəcəsini müəyyən etmək məqsədilə müvafiq ekspertizalar təyin edilib. Hazırda istintaq araşdırmaları davam etdirilir. Araşdırmanın nəticəsindən asılı olaraq məsələyə hüquqi qiymət veriləcək".