Talış kəndində konsert-tamaşa nümayiş olunub

Tərtər rayonunun işğaldan azad olunmuş Talış kəndində konsert-tamaşa nümayiş olunub.

Azərbaycan Dövlət Kukla Teatrı və Qarabağ İqtisadi Rayonunda Bərpa, Tikinti və İdarəetmə Xidmətinin birgə təşkilatçılığı ilə baş tutan tədbir ümummilli lider Heydər Əliyevin anadan olmasının 100 və Azərbaycan milli teatrının yaranmasının 150 illiyinə həsr olunub. Teatr ustaları azyaşlı tamaşaçılar qarşısına “Şəngülüm, Məngülüm” tamaşası ilə çıxıblar.

Mikayıl Müşfiqin məşhur mənzum nağılı əsasında hazırlanan mono kukla tamaşasının rejissoru Anar Məmmədov, quruluşçu rəssamı İqbal Əliyev, bəstəkarı Elza Seyidcahandır. Teatrın aparıcı aktrisası Ülviyyə Əliyeva canlı planda nağılçı ilə yanaşı, 5 kuklanı canlandırıb.

Qastrolda teatrın aktyor truppası ilə yanaşı, teatrın nəzdində fəaliyyət göstərən “Oyuq” teatr-studiyasının vokalçıları da xüsusi proqramla çıxış ediblər. Tamaşalar izləyicilərdə xoş təəssürat yaradıb.

Qeyd edək ki, bu, sözügedən aktyor heyətinin Talış kəndinə ikinci səfəridir.