Tarixi binanı narkoman evinə çevirənlər | Sakinlər qorxu içində

Dünyaşöhrətli musiqiçilər Leopold və Mstislav Rostropoviçlərin ev-muzeyinin yerləşdiyi binada qanunsuz söküntü aparılıb.

Binada yaşayan sakinlərin bir çoxu evlərini sataraq köçüblər. Daha sonra isə mülkiyyətçi tərəfindən qanunsuz söküntü işləri aparılıb. Hazırda sakinlər sözügedən binada qorxu içində yaşayırlar.

“Deyirlər ki, buranı park edəcəklər. Binanı söküb, hər tərəfi açıq qoyublar. Küçənin iti, pişiyi, narkomanı buradadır”, – deyə bina sakini narazılığını dilə gətirib.

Məsələ ilə bağlı Dövlət Şəhərsalma və Arxitektura Komitəsindən bildirilib ki, Bakı Şəhər Memarlıq və Şəhərsalma Baş İdarəsi tərəfindən Yasamal rayonu, Rostropoviçlər, 19 ünvanında şəhərsalma nəzarəti qaydasında monitorinq keçirilib və sözügedən ünvanda yerləşən yerli əhəmiyyətli tarix və mədəniyyət abidəsində qanunsuz söküntü işlərinin aparılması faktı aşkarlanıb.

Baş İdarə əməkdaşları tərəfindən qanunsuz görülən işlər bir müddət əvvəl dayandırılıb və müvafiq tədbirlərin görülməsi üçün aidiyyəti qurumlara, həmçinin tarixi abidə olduğu nəzərə alınaraq Mədəniyyət Nazirliyinə məlumat verilib.

Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Bakı Regional İdarəsindən isə bildirilib ki, yanvarın 9-da Yasamal rayonu, Rostropoviçlər küçəsi, 19 ünvanında yerləşən 5595 inventar nömrəli yerli əhəmiyyətli memarlıq abidəsinə müdaxilə faktı aşkar edilib.

Abidəyə baxış keçirilən zaman qanunsuz söküntü işlərinin aparıldığı müəyyən olunub. Aidiyyəti dövlət orqanlarının əməkdaşları ilə birgə söküntü işləri dayandırılıb. Aparılan qanunsuz müdaxilə hallarının aradan qaldırılması ilə bağlı xəbərdarlıq olunub. Buna baxmayaraq, 19 yanvar tarixində qanunsuz söküntü işlərinin yenidən təkrarlandığı aşkar edilib.

Fakt üzrə Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsi ilə birgə qanunsuz görülən işlər dayandırılıb. Abidənin əvvəlki vəziyyətinə qaytarılması üçün tədbirlər davam etdirilir.