Tikinti işləri əhalinin gününü niyə qara edib? - “Bunun yox, bunu işlədənin təqsiridir” - Baku TV

Bakıda çoxmərtəbəli binaların tikildiyi yerlərin çoxunda işlər səhərə qədər davam edir. Xüsusən ağır tonnajlı avtomobillərin gecə saatlarında tikinti ərazilərində olması vətəndaşları narahat edir.

Sakinlər bildirirlər ki, sözügedən məsələ narahatlığa və vətəndaşların səsə görə rahat yata bilməməsinə səbəb olur.

“Mən evdəki adi səsdən əsəbiləşən adamam. Belə səslərə isə dayanmaq olmaz. Gərək başını götürüb qaçasan”, – deyə sakin narazılığını dilə gətirib.

Tikinti şirkətləri isə bildirir ki, bu problem yük maşınlarının əraziyə gündüz saatlarında girməsinə icazə verilmədiyindən yaranır.

“Məcburuq ki, daşınma, beton işlərini gecə saatlarında həyata keçirək. Elə olur ki, bu işlər səhər saat 6-ya kimi davam edir”, – texniki nəzarətçi Namiq Rəsulov Baku TV-yə açıqlamasında deyib.