”TikTok” əməliyyatında saxlanılan “şairə” məhkəmədə | Almaz Əsgərova şahid kimi ifadə verib

Sosial şəbəkələrdə özünü şairə kimi təqdim edən İlhamə Əskərovanın cinayət işinin növbəti məhkəmə prosesi keçirilib.

Bakı Ağır Cinayətlər Məhkəməsinin hakimi Anar Sadıqovun sədrliyi ilə baş tutan prosesdə İlhamə Əskərovanın mənzilində yoxlama aparan polis əməkdaşlarından daha bir nəfəri ifadə verdikdən sonra müdafiə tərəfi onun ev dustaqlığına buraxılması ilə bağlı yenidən vəsatət qaldırıb. Müşavirədən sonra vəsatətin əsassız olduğu bildirilərək təmin edilməyib.

Vəkilin növbəti vəsatəti isə İlhamə Əskərovanın anası Almaz Əskərovanın əlavə şahid kimi prosesdə dindirilməsi ilə bağlı olub. Dövlət ittihamçısı buna etiraz etsə də, təqsirləndirilənin anasının prosesdə ifadə verməsi təmin olunub.

Almaz Əskərova ifadəsi zamanı qızının evində həbs olunmasını belə izah edib:

“Biz səhər evdə idik, birdən qapı döyüldü. Qapını açanda 5-6 nəfər içəri daxil oldu. Məni çölə çıxartdılar, başladılar evi axtarmağa, mən də pəncərədən hər şeyi görürdüm. Baxdım ki, qızımın əlləri qandallıdır”.

Növbəti iclas sentyabrın 17-nə təyin olunub.