Tiktoker İlhaməyə hansı cəza verildi? | Məhkəmənin detalları

“TikTok”da əxlaqsızlığın təbliğinə qarşı keçirilən əməliyyatlarla bağlı həbs olunan şairə İlhamə Elşadqızı barəsində cinayət işi üzrə məhkəmə prosesi yekunlaşıb.

Bakı Ağır Cinayətlər Məhkəməsində hakim Anar Sadıqovun sədirliyi ilə keçirilən prosesdə sənədlər tədqiq olunub, təqsirləndirilən şəxsin saxlanılması, evində aparılan axtarışı əks etdirən videogörüntülər nümayiş olunub.

Daha sonra məhkəmə istintaqının yekunlaşdığı elan edilib.

Dövlət ittihamçısı çıxış edərək təqsirləndirilən şəxsin 4 il 6 ay müddətinə azadlıqdan məhrumetmə cəzasına məhkum edilməsini istəyib. Təqsirləndirilən İlhamə Elşadqızı isə son sözündə ittihamları qəbul etmədiyini bildirərək məhkəmədən ona bəraət verilməsini xahiş edib.

Sonda məhkəmənin qərarı ilə İlhamə Elşadqızı Cinayət Məcəlləsinin 234.1.1-ci, yəni satış məqsədi olmadan külli miqdarda qanunsuz narkotik vasitə və ya psixotrop maddələri saxlama və ya daşıma maddəsi ilə təqsirli bilinərək 3 il müddətinə azadlıqdan məhrum olunub.