Ukraynanın yeganə azərbaycanlı Xalq rəssamı | Müharibə sənətinə mane ola bilmir

Əslən Azərbaycanın Gəncə bölgəsindən olan, 40 ildir Xarkovda yaşayan heykəltaraş Katib Məmmədov Ukraynanın Xalq rəssamıdır. O, bu adı daşıyan yeganə azərbaycanlıdır.

Bir çox tanınmış əsərlərin müəllifi olan həmyerlimiz həm də buranın fəxri vətəndaşıdır.

Katib Məmmədov Ukraynada hərbi əməliyyatların başlandığı gündən ən qaynar nöqtələrdən biri olan doğma şəhərini tərk etməsə də, müharibənin dəhşətləri onların da ailəsindən yan keçməyib. Belə ki, onunla birgə Xarkovda yaşayan qardaşı oğlu döyüşlər zamanı küçədə gülləyə tuş gələrək həlak olub.

Həmyerlimiz raket hücumları səbəbindən emalatxanasını zirzəmiyə daşıyaraq işini orada davam etdirir. Emalatxanasının yerləşdiyi ərazi hərdən hava hücumlarına məruz qalır.

“Bir il əvvəl raket hücumuna məruz qaldıq. Emalatxanın üstü deşik-deşik idi”, – deyə K.Məmmədov qeyd edib.

Azərbaycanlı heykəltaraş sifarişlərlə yanaşı, şəxsi təşəbbüsü ilə də əsərlər yaradır. Onlardan biri Azərbaycanın ümummilli lideri Heydər Əliyevlə bağlıdır.

O, istər müharibəyə qədərki dövrdə, istərsə də müharibə dövründə fəaliyyətinə görə müxtəlif mükafatlara layiq görülüb. Xarkov vilayətinin Kupyansk şəhəri istiqamətində həlak olan həkim, Ukrayna qəhrəmanlarının barelyefinin hazırlanması da, heykəltaraş həmyerlimizə həvalə edilib.