Ümummilli liderin 100 illiyi ilə bağlı forum

Fevralın 25-də Türkiyənin İstanbul şəhərində Azərbaycan xalqının ümummilli lideri Heydər Əliyevin anadan olmasının 100 illiyi ilə bağlı “Qarabağdan Anadoluya: Gənclərin İstanbul Forumu” keçirilib.

Azərbaycan Gənclər Fondunun dəstəyi, Türkiyə Azərbaycan Dərnəkləri Federasiyasının tərəfdaşlığı, “Qızılbaş” Gəncləri Maarifləndirmə İctimai Birliyinin təşkilatçılığı ilə baş tutan forum Qarabağ savaşında şəhid olanların və Türkiyədə baş verən zəlzələ nəticəsində həyatını itirənlərin ruhuna hörmət əlaməti olaraq bir dəqiqəlik sükutla başlayıb. Daha sonra Azərbaycan və Türkiyənin dövlət himnləri səsləndirilib.

Açılış nitqini söyləyən forumun layihə rəhbəri, jurnalist Aqil Ələsgər Vətən müharibəsində olduğu kimi, “Əsrin fəlakəti” olaraq adlandırılan zəlzələ faciəsində də Azərbaycan və Türkiyə xalqlarının bütün dünyaya birliklərini nümayiş etdirdiyini vurğulayıb. Çıxışlardan sonra “Anadoludan Qarabağa: Media Paneli” və “Qarabağdan Anadoluya Gənclər Paneli” təşkil edilib.

Türk xalqlarının gəncləri arasında körpü qurulması yolunda atılan addımlardan bəhs edən millət vəkili Şamil Ayrım bu kimi forumların reallaşdırılmasının böyük əhəmiyyət kəsb etdiyini bildirib. Forumun sonunda həmrəylik rəmzi olaraq plaketlər təqdim edilib.