Uşağı həkimə aparmaq istəyən anaya məşqçi mane olub

Aprelin 29-da Sumqayıtda azyaşlı oğlanın idman məktəbində aldığı xəsarət səbəbindən vəfat etməsi barədə yeni detallar məlum olub.

Oxu.az-ın məlumatına görə, 2016-cı il təvəllüdlü Fərid Bakarov və qardaşı iki aydır Avropa Oyunlarının bürünc mükafatçısı, idmançı Mehman Xəlilovun keçirdiyi sambo məşqlərində birlikdə məşq edirmişlər. Mehman Xəlilovun Fəridə qarşı təhlükəli fənd işlətməsi səbəbi ilə onun başının bədəninin altında qalması və boynunun qırılması Fəridin qardaşının gözləri önündə baş verib. Hadisə zamanı isə uşaqların anası onları qapıda gözləyirmiş.

Uşaq xəsarət aldıqdan sonra Mehman Xəlilov ananı çağırıb və uşağının altına sidik qaçırdığını söyləyib. Bu zaman ana 7 yaşlı uşağın niyə sidik qaçırdığına təəccüblənib və ayaqlarının tutulduğunu görüb. Mehman Xəlilov uşağın məşq zamanı halsız düşdüyünü bildirib. Ana təcili yardım çağırmaq istəsə də, Mehman Xəlilov mane olub. O, uşağı öz qucağında piyada evə gətirib. Bu zaman uşaq qusub, sonra ana uşağı çimizdirib və görüb ki, halı yoxdur. Həmin vaxt Mehman da orada olub. Ana taksi çağırıb və uşağı Sumqayıt Şəhər Uşaq Xəstəxanasında aparıblar. Amma onun həyatını xilas etmək mümkün olmayıb.

Ölən uşaq hərbçi olmaq istədiyi üçün anası idmana yazdırıbmış. Fərid Bakarovun qohumları sayta bildiriblər ki, uşağın anasının görüntülərdən xəbəri yoxdur. Ana uşağı ilə davranış videosunu görmədiyi üçün “işdir də, olub”, – deyir.

Hadisənin baş verdiyi gün uşaq məşqə getmək istəmirmiş. Ana onu güclə aparıb. Ailənin iki oğul övladı olub, onların Mehman Xəlilovla heç bir qohumluqları yoxdur.