“Üzümə necə at kimi dirənmisən?!” | Sakinlər ayağa qalxdı: “Bu qədər adamı təhqir edirsən” - Baku TV

“Olympus Botanic Garden” şirkəti 2021-ci ildə paytaxtın Yasamal rayonu, Mikayıl Müşfiq küçəsi, 172 ünvanında iki çoxmərtəbəli binanın tikintisinə başlayıb. Sakinlərə binanın 2023-cü ildə təhvil veriləcəyi vəd olunsa da, artıq 2026-cı ildir və tikinti işləri hələ də tam yekunlaşmayıb. Buna baxmayaraq, bəzi vətəndaşlar mənzillərə köçərək yarımçıq binada yaşamağa məcbur qalıblar.

Sakinlərin sözlərinə görə, binalarda yaşayış üçün normal şərait yaradılmayıb və çoxsaylı problemlər mövcuddur.

“Biz bu binaya yanvar ayında köçmüşük, amma tikinti tam başa çatmayıb. İkinci binada, ümumiyyətlə, elektrik xətləri çəkilməyib. Buna görə də “Azərişıq” ASC sayğac quraşdıra bilmir. Bu isə bizi böyük borc yükü altında qoyur. Yaşayış üçün normal şərait yoxdur. Hətta aşağı mərtəbələrin pəncərələri belə quraşdırılmayıb. Kanalizasiya sistemi normal çəkilməyib, qrunt sularının axıdılması üçün nəzərdə tutulan kanallar isə yararsız vəziyyətdədir”, – sakinlərdən biri bildirib.

Digər sakin isə binada uşaqların təhlükəsizliyi üçün heç bir şəraitin olmadığını deyib:

“Vəziyyət acınacaqlıdır. Uşaqlar evdə sanki həbs həyatı yaşayırlar. Təhlükəsizlik təmin edilməyib, şaxta qapıları belə yoxdur. Uşaq oraya düşüb xəsarət alsa və ya həyatını itirsə, bunun məsuliyyətini kimin daşıyacağını bilmirik. Şirkətdə əlaqə saxlaya biləcəyimiz məsul şəxs yoxdur. Dəfələrlə müraciət etmişik, amma heç kim bizimlə görüşmür”.

Mənzil-Tikinti Kooperativinin nümayəndəsi Azər Çələbiyev isə binada ciddi problemin qalmadığını bildirib:

“Orada böyük problem qalmayıb. Sadəcə, həyətin abadlaşdırılması başa çatmayıb. Həyət düzəldiləcək, vəssalam. Başqa problem yoxdur”.