Vardanyanın məhkəməsində ifadələr dinlənildi

Azərbaycanın Cinayət Məcəlləsinin sülh və insanlıq əleyhinə cinayətlər, müharibə cinayətləri, habelə terrorçuluq, terrorçuluğu maliyyələşdirmə ilə bağlı maddələri ilə və digər ağır cinayətlərdə təqsirləndirilən Ermənistan vətəndaşı Ruben Vardanyanın barəsində cinayət işi üzrə məhkəmə prosesi keçirilib.

Hakim Zeynal Ağayev prosesdə ilk dəfə iştirak edən zərərçəkmiş şəxslərə və zərərçəkmiş şəxslərin hüquqi varislərinə məhkəmə heyətini, dövlət ittihamını müdafiə edən prokurorları, tərcüməçiləri və s. təqdim edib, habelə onların qanunvericiliklə nəzərdə tutulmuş hüquqlarını və vəzifələrini izah edib. 

Sonra zərərçəkmiş şəxslərin ifadələri dinlənilib.

Eldar Hüseynov bildirib ki, Xocalıda Fərrux dağı, Maarif Abbasov, Ramiq Həsənov və Rüstəm Rüstəmli Dağyurd, Xocalı rayonunun Xanabad kəndi ərazisində isə Elyas Məmmədli, Nazim Ağayev, Rəşmi Hümmətov, Coşqun Nəsirov, Əhliyar Muradov, Elgün İsmayıllı, Racib Şükürov, Xəqani Quliyev və Turan Həsənli düşmənin təxribatı nəticəsində müxtəlif dərəcəli bədən xəsarətləri alıblar, daha bir neçə nəfər isə həlak olub.

Dövlət ittihamçısı Vüsal Abdullayevin suallarını cavablandıran zərərçəkmiş Feyruz Musayev diqqətə çatdırıb ki, buldozerlə Kəlbəcər rayonunun Zar kəndi yaxınlığında mühəndis işlərini görərkən texnika düşmən tərəfindən pulemyot silahlardan atəşə tutulub. Özü xəsarət almasa da, texnika yararsız hala düşüb.

Müzamil Orucov Kəlbəcər rayonu, İsrail Babayev isə Kəlbəcər-Zod istiqamətində düşmən təxribatı nəticəsində yaralandıqlarını söyləyiblər.

Fəqan Vəliyev Ağdam rayonu ərazisində içərisində olduğu tibbi yardım maşınının düşmən tərəfindən raket mərmisi ilə vurulması, Əhliyar Muradov Ağdam rayonunda meşəlik ərazidə atılmış minaatan mərmisinin yaxınlığına düşüb partlaması, Anar Cəfərov və Rəşad Abbasov isə Ağdamın Mərzili kəndi istiqamətində içərisində olduqları avtomobilin düşmən tərəfindən basdırılmış minaya düşməsi nəticəsində yaralandıqlarını qeyd ediblər.

Digər zərərçəkmiş şəxslər ‒ Səfər Qasımov, Elgün Talıbov və Tuqay Rəhimli də ifadələr veriblər. Ermənistan Ordusunun qalıqları və qanunsuz erməni silahlı dəstələri tərəfindən açılan atəşlər nəticəsində xəsarət alan və həlak olanlar barədə məlumatlar veriblər.

Məhkəmə prosesi sənədlərin və cinayət işi materiallarında olan digər sübutların tədqiqi ilə davam etdirilib.