Vardanyanın növbəti məhkəməsi keçirildi

Azərbaycanın Cinayət Məcəlləsinin sülh və insanlıq əleyhinə cinayətlər, müharibə cinayətləri, habelə terrorçuluq, terrorçuluğu maliyyələşdirmə ilə bağlı maddələri ilə və digər ağır cinayətlərdə təqsirləndirilən Ermənistan vətəndaşı Ruben Vardanyanın barəsində cinayət işi üzrə məhkəmə prosesi keçirilib.

Zərərçəkmiş Elşən Babayev dövlət ittihamçısı Vüsal Abdullayevin suallarını cavablandıraraq bildirib ki, Ağdərə rayonu ərazisində Ermənistan ordusunun qalıqları və qanunsuz erməni silahlı dəstələri tərəfindən atılan tank əleyhinə mərminin yaxınlıqlarında partlaması nəticəsində Tural Əmirov və Elçin Salmanov həlak olub, o və Yusif Həsənov isə yaralanıblar.

Zərərçəkmiş Fazil Əmirli və Xalid Şükürlü qeyd edib ki, Xocalı rayonunun Malıbəyli kəndi ərazisində düşmən təxribatı nəticəsində özləri, eləcə də Seyfəddin Cabbarov, Kamran Nəcəfov, Sadiq Məmmədov və Nicat Əhmədzadə xəsarət alıblar.

İlqar Qasımov Xocalı rayonu istiqamətində düşmən tərəfindən basdırılan minanın, Elvin Məmmədov isə Xocalının Sərdarkənd kəndi ərazisində atılan minaatan mərmisinin yaxınlığına düşüb partlaması zamanı yaralandıqlarını diqqətə çatdırıblar. Onlardan başqa Kamran Həsənov və Hüseyn Hüseynov da müxtəlif dərəcəli bədən xəsarətləri alıblar.

Dövlət ittihamçısı Fuad Musayevin suallarını cavablandıran zərərçəkmiş Taleh Hümbətzadə vurğulayıb ki, Xocavənd rayonunun Yenikənd kəndi ərazisində Ermənistan ordusunun qalıqları və qanunsuz erməni silahlı dəstələrinin atdığı artilleriya mərmisinin yaxınlığına düşərək partlaması nəticəsində yaralanıb. Hadisə zamanı Cavid Şavqatlı da xəsarət alıb.

Məhkəmə prosesi sənədlərin və cinayət işi materiallarında olan digər sübutların tədqiqi ilə davam etdirilib.