Xaçmazda 20 Yanvar şəhidləri anılıb

Xaçmaz rayonunda 20 Yanvar şəhidlərinin əziz xatirəsi böyük ehtiramla anılıb.

Rayon İcra Hakimiyyətinin başçısı Elnur Rzayev Xaçmaz şəhərindəki Şəhidlər Xiyabanında “Əbədi məşəl” abidə-kompleksi önünə əklil qoyub. Daha sonra rayon rəhbərliyi, şəhid ailələri və yerli hüquq-mühafizə orqanlarının əməkdaşları ilə birlikdə vətənimizin azadlığı uğrunda canından keçən qəhrəman oğul və qızlarımızın xatirəsi ehtiramla yad edilib, xaçmazlı şəhidlərin xatirə lövhələri önünə tər qərənfillər düzülüb. Milli Qəhrəman Yavər Şahbazovun büstü ziyarət olunub.

Xaçmaz rayonu ölkəmizin azadlığı və ərazi bütövlüyü uğrunda mübarizədə ümumilikdə 292 şəhid verib. Rayon İcra Hakimiyyətinin başçısı Elnur Rzayev şəhid ailələri ilə söhbət zamanı 44 günlük Vətən müharibəsində qazanılan tarixi qələbədən danışıb. 20 Yanvar faciəsini xalqımızın qəhrəmanlıq salnaməsi, milli qürur günü kimi səciyyələndirib.

Saat 12:00-da Yanvar faciəsi şəhidlərinin, eləcə də Azərbaycanın ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib. Rayon ərazisində avtomobillərin hərəkəti dayandırılıb.