Xaçmazda "Kitabsevərlər" adlı tədbir keçirilib

Xaçmaz Rayon İcra Hakimiyyəti və Quba-Xaçmaz Regional Təhsil İdarəsinin birgə təşkilatçılığı ilə akademik Zərifə Əliyevanın doğum günü və “23 Aprel – Ümumdünya Kitab və Müəlliflik Hüququ Günü” münasibətilə “Kitabsevərlər” adlı tədbir keçirilib.

Zəfər Parkında təşkil olunan tədbirdə Xaçmaz Rayon İcra Hakimiyyətinin başçısı Elnur Rzayev, Yeni Azərbaycan Partiyası Xaçmaz rayon təşkilatının sədri Məhəmməd Balaqadaşov, Quba-Xaçmaz Regional Təhsil İdarəsinin müdiri Çoşqun Əliyev, rayon ictimaiyyətinin nümayəndələri və məktəblilər iştirak ediblər.

Təqdim olunan sərgidə ümummilli lider Heydər Əliyevin, görkəmli oftalmoloq alim Zərifə Əliyevanın həyat və yaradıcılığından bəhs edən kitablar və rəsmlər, həmçinin Müzəffər Ali Baş Komandan, Prezident İlham Əliyevin rəhbərliyi ilə tarixi qələbəmizi özündə əks etdirən rəsm əsərləri iştirakçılar tərəfindən maraqla izlənilib.

Tədbirdə ədəbi-bədii kompozisiyalar nümayiş olunub, şanlı zəfərimizi tərənnüm edən mahnılar səsləndirilib.

Sonda “Yaşıl Dünya naminə həmrəylik ili” çərçivəsində Zəfər parkında ağacəkmə aksiyası təşkil olunub.