Xaçmazda “Şəxsiyyətlər parkı” əhalinin istifadəsinə verildi

Novruz bayramı ərəfəsində Xaçmaz şəhəri, Heydər Əliyev prospektində yerləşən Şəxsiyyətlər parkı yenilənib.

Rayon İcra Hakimiyyətinin başçısı Elnur Rzayev, Yeni Azərbaycan Partiyası Xaçmaz rayon təşkilatının sədri Məhəmməd Balaqadaşov və bir qrup ziyalı yenilənən parkda yaradılan şəraitlə tanış olublar. İcra başçısı Elnur Rzayev Xaçmaz şəhərində, eləcə də qəsəbə və kəndlərdə abadlıq, quruculuq işlərinin mərhələli şəkildə davam etdiriləcəyini bildirib.

Qeyd edək ki, yenilənən Şəxsiyyətlər parkının funksionallığı artırılıb. Yeni dekorativ ağac və gül kolları əkilib, oturacaqlar qoyulub. Ərazidə avtomobillərin rahat və təhlükəsiz hərəkəti üçün asfalt örtük vurulub, velosiped həvəskarları üçün xüsusi zolaqlar ayrılıb, piyada keçidləri salınıb.

Müasir dizayn əsasında yenilənən istirahət məkanı gecə işıqlandırma sistemi ilə təmin olunub. Parkın mərkəzindən keçən avtomobil yolunun bərpa edilməsi isə sürücülərin Heydər Əliyev prospekti ilə birbaşa hərəkət etməsinə imkan yaradır.