Xalq artisti Rasim Balayev dünyasını dəyişdi - Baku TV

Azərbaycan Kinematoqrafçılar İttifaqının sədri, Xalq artisti Rasim Balayev vəfat edib.

Tanınmış aktyor İstanbulda yerləşən “Memorial” xəstəxanasında dünyasını dəyişib.

Qeyd edək ki, Rasim Balayev bir müddətdir səhhətində yaranan problemlərlə əlaqədar müalicə alırdı. O, ağciyər xərçəngindən və yüksək şəkərdən əziyyət çəkirdi.

Rasim Balayev 8 avqust 1948-ci ildə Ağsu rayonunda anadan olub. Azərbaycan Dövlət İncəsənət İnstitutunu bitirən Rasim Balayev ilk rolunu “Ulduzlar sönmür” filmində alıb. Daha sonra o, “Bu şirin söz, azadlıq”, “Sənin birinci saatın”, “Xoşbəxtlik səhnəsi”, “Mən hələ qayıdacağam”, “Birisi gün gecəyarısı” kimi ekran əsərlərində epizodik rolları uğurla canlandırıb.

Rasim Balayev “Nəsimi”, “Babək” və “Dədə Qorqud” filmlərində yaratdığı obrazlarla tamaşaçıların böyük rəğbətini qazanıb. O həmçinin “Özbəkfilm”, “Mosfilm” və digər studiyalar ilə fəal əməkdaşlıq edib və bir sıra filmlərə çəkilib.

Rasim Balayev 2022-ci ildən Azərbaycan Kinematoqrafçılar İttifaqının sədri vəzifəsini icra edib.