Xankəndidə 50 ildən sonra badminton üzrə ölkə çempionatı keçirildi

İşğaldan azad edilmiş torpaqlarda mütəmadi olaraq idman yarışları təşkil olunur. Bu dəfə 50 ildən sonra Xankəndi şəhərində badminton üzrə ölkə çempionatı keçirilib.

Final yarışı Xankəndi Şəhər Nizami Gəncəvi adına 4 nömrəli orta məktəbdə baş tutub.

Təhsil ocağının idman zalında keçirilən badminton üzrə Azərbaycan çempionatında Prezidentin xüsusi nümayəndəliyinin əməkdaşları, gənclər və idman naziri Fərid Qayıbov və media nümayəndələri iştirak ediblər.

F.Qayıbov mətbuata açıqlamasında bildirib ki, Azərbaycan idmanında tarixi hadisə yaşanır.

Mütəmadi olaraq Qarabağın işğaldan azad edilən şəhər və rayonlarında idman yarışları keçirilir. Xankəndi şəhəri də artıq bir neçə idman yarışına ev sahibliyi edib. Nazir Xankəndinin həm də idman mərkəzinə çevriləcəyindən və bu günədək adıçəkilən şəhərdə keçirilən idman yarışlarından da bəhs edib.

Qeyd edək ki, 1974-cü ildə Xankəndidə keçirilmiş turnirdə üç kateqoriya üzrə mükafatçılar sırasında yer alan Azərbaycan badminton ailəsinin üzvü Mahmud Məmmədov da fəxri qonaq qismində final qarşılaşmalarını izləyib.

Qalib və mükafatçıları Prezidentin xüsusi nümayəndəliyinin əməkdaşları, gənclər və idman naziri Fərid Qayıbov, Azərbaycan Badminton Federasiyasının prezidenti Taleh Ziyadov təltif ediblər.