Xərçəng xəstəliyinin qarşısını ala bilən canlılarla bağlı sirli faktlar | ARAŞDIRMA

Baku TV-də göbələklər haqqında araşdırma materialı yayımlanıb.

Bildirilib ki, göbələklər bitki sayılsa da, heyvanlara yaxındır. Onların hüceyrələrindəki kimyəvi maddələrə xərçənglərdə rast gəlinir.

Diqqətə çatdırılıb ki, bitkilərin intellekti və öz aralarında kommunikasiyanın olması haqda elmi araşdırmaları kanadalı ekoloq Suzanna Simard aparır və belə nəticəyə gəlinir ki, bütün bitkilər, meşələr, dünyanın ağac örtüyü bir-biri ilə əlaqədədir.

S.Simardın araşdırmasına görə, bütün bitki aləmi göbələklər vasitəsilə xəbərləşir. Beləliklə, sanki göbələk aləmi təbiətin, yaşıl aləmin internetidir.

Planetin ən böyük canlısı da göbələkdir. ABŞ-nin Oreqon ştatındakı meşədə aşkar edilib. Canlı orqanizmin yeraltındakı cücərtilərinin sahəsi 880 hektar, yaşı isə 2 400 ildir. Onu “Canavar” adlandırırlar.

Onun cücərtiləri torpaq qatından bir metr aşağıda yerləşir və təxminən 1 665 futbol meydançasına bərabər olan ərazini əhatə edir.

Hallüsinasiyaya səbəb olan göbələklərin tərkibindəki maddələr insan beynindəki serotonin reseptorlarına təsir edir. Nəticədə görmə, eşitmə və duyğu hallüsinasiyaları kimi dəyişikliklərə səbəb olur. Bu növlər “Sehrli göbələklər” adı ilə tanınır.

Sözügedən göbələklərin istifadəsi qədim zamanlardan bəri bir çox mədəniyyətlərdə dini ayinlərdə və şamanist rituallarda geniş yayılıb. Göbələklərin təsiri adətən 4-6 saat davam edir və bu zaman fərqli hallüsinasiyalar, ətraf mühitlə harmonik bir duyğu və bəzi hallarda dərindən düşünmə vəziyyəti yaşanır.

Mikoloq Elgün Mustafabəyli insanlara hallüsinasiyaya səbəb olan göbələklərdən istifadə etməyi məsləhət görmür:

“Çünki göbələk çox fərqli bir qida vasitəsidir və hər bir insanda müxtəlif reaksiyalara səbəb ola bilər. Sözügedən göbələklər qaraciyərə zərərdir. Çünki onların dozası hələ ki dəqiq müəyyən edilməyib. Biz onu istifadə edib heç nə hiss etməyə də bilərik, amma iki-üç il sonra qaraciyər çatışmazlığı yarada bilər və ya daha gənc yaşda həyatımızı itirə bilərik”.