Xəstələrə narkotik verən həkim məhkəmə qarşısına çıxarıldı

Bakıda yerləşən İran Klinikasının ortoped həkimi Seif Bargihi Tohid Rahman ölkəyə qaçaqmalçılıq yolu ilə narkotik tərkibli vasitələr və güclü təsiredici dərmanlar gətirdiyinə görə cinayət məsuliyyətinə cəlb edilib.

Cinayət işi Bakı Ağır Cinayətlər Məhkəməsində araşdırılıb. Seif Bargihi məhkəmədə verilmiş ittihamlarla özünü təqsirli bilib. O, ifadəsində deyib ki, həmin dərmanları Tehranda olarkən xeyriyyə məqsədilə əldə edib. Bakıya gələndə isə onları burada ehtiyacı olan xəstələrə verməyi düşünüb.

İranlı həkimin sözlərinə görə, həmin dərmanlar Parkinson xəstəliyindən əziyyət çəkən bir sıra xəstələrə müsbət təsir etdiyindən buna görə ondan pul da almayıb. Seif Bargihi dərmanları qazanc əldə etmək üçün deyil, sırf xəstələrə yardım üçün gətirdiyini bildirib.

Məhkəmənin hökmünə əsasən, Seif Bargihi Tohid Rahman 10 min manat cərimə cəzasına məhkum edilib. Cəriməni ödəyən kimi dərhal ölkəsinə qayıdıb.

Qeyd edək ki, təqsirləndirilən həkim Tehran Universitetinin professoru, həmçinin FIFA-nın dopinq və tibbi işlər üzrə məmurudur. O, eyni zamanda Səhiyyə Xidmətləri Universitetinin nəzdində “İmam Xomeyni” xəstəxanasında və İran Qırmızı Aypara Cəmiyyətinin Azərbaycandakı Nümayəndəliyinin klinikasında həkim kimi işləyir.