Xəzər dənizinin suyu içməli suya çeviriləcək

Qlobal iqlim dəyişikliyi yenidən Xəzər dənizinin suyunun şirinləşdirilməsinə ehtiyac yaradıb.

Belə ki, Prezident İlham Əliyevin 2023-cü ilin aprelin 12-də imzaladığı sərəncamla paytaxtın və ətraf ərazilərin su təminatının yaxşılaşdırılması üçün dəniz suyunun duzsuzlaşdırılması yolu ilə içməli su istehsalı sahəsində pilot layihənin icrasına başlanılıb.

“Azərsu” Açıq Səhmdar Cəmiyyəti ilə İsrailin milli su operatorunun birlikdə reallaşdırdığı layihə çərçivəsində texniki məsləhət xidmətlərinin göstərilməsi üzrə müqavilə imzalanıb.

Ətraf mühit məsələləri üzrə ekspert Rövşən Abbasovun sözlərinə görə, Azərbaycanda dəniz suyunun içməli suya çevrilməsi yeni hadisə deyil. Lakin o vaxtlar köhnə texnologiyalardan istifadə olunurdu. Hazırda dəniz suyunun şirinləşdirilməsi müasir texnologiyalarla həyata keçirilir.

Ekspert bildirir ki, bu xərclər texnologiyaların seçimindən asılı olaraq dəyişir. Okean suyunun bir kubmetrinin duzsuzlaşdırılması 1 manat 50 qəpikdən 2 manatadək başa gəlir. Xəzər dənizinin suyunun duzluluğu isə okeanla müqayisədə xeyli aşağı olduğundan suyun şirinləşdirilməsinə xərclənəcək vəsait də az olacaq.

Ekoloq Sevil Yüzbaşova isə hesab edir ki, su mənbələri insanların məskunlaşdıqları ərazilərə yaxın olmalıdır.

Bu üsul dünya təcrübəsində də sınaqdan keçirilir. İsraildə istehlakçılara verilən suyun təqribən 60 faizi dəniz suyunun duzsuzlaşdırılması yolu ilə əldə edilir.

Bundan əlavə, Qətərdə, Səudiyyə Ərəbistanında, İspaniyanın və Fransanın cənub, ABŞ-nin qərb hissəsində suya olan tələbat dəniz və okean sularının duzsuzlaşdırılması yolu ilə ödənilir.