Xocalı və Ağdərəyə növbəti köç karvanı baş tutub

Noyabrın 13-də Xocalı rayonunun Daşbulaq və Badara kəndlərinə növbəti köç olub.

Hər iki kəndə ümumilikdə 50 nəfərdən ibarət 15 ailə köçürülüb. Onlardan 9 ailə (31 nəfər) Daşbulaq, 6 ailə (19 nəfər) Badara kəndində daimi məskunlaşıb.

Ailələrə yeni mənzillərin açarları təqdim olunub. Mərasimdə çıxış edən Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin icraçı direktor müavini Mahmud Əfəndiyev sakinləri doğma torpaqlara qayıdış münasibətilə təbrik edib.

O bildirib ki, köç edən ailələrin sosial rifahı və məşğulluğu diqqət mərkəzində saxlanılır, onlara həm dövlət, həm də özəl sektorda iş imkanları yaradılır. Sahibkarlıq fəaliyyəti ilə məşğul olmaq istəyənlər üçün bütün lazımi şərait var.

Noyabrın 13-də Ağdərə rayonunun Vəngli kəndinə də növbəti köç prosesi baş tutub. Bu mərhələdə kəndə 45 nəfərdən ibarət 11 ailə köçürülüb. Doğma yurda köçürülən ailələrə yeni mənzillərinin açarları təqdim edilib.

Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətindən bildirilib ki, kənddə bütün zəruri infrastruktur yenidən qurulub. Sakinlər üçün rahat və təhlükəsiz yaşayış mühiti yaradılıb.