Xüsusi müxbirimiz Mübariz Aslanov Ukraynanın ali mükafatına layiq görüldü

Baku TV və Report İnformasiya Agentliyinin Şərqi Avropa üzrə xüsusi müxbiri Mübariz Aslanov Ukraynanın ali mükafatı ilə təltif olunub.

Bu barədə ölkənin müdafiə naziri Rüstəm Umerov xüsusi əmr imzalayıb.

Sənədə əsasən, Ukrayna Silahlı Qüvvələrinin fəaliyyətini, hərbi qulluqçularının qəhrəmanlıqlarını peşəkar və obyektiv şəkildə işıqlandırdığına, xidməti vəzifələrini nümunəvi yerinə yetirdiyinə, Rusiyanın Ukraynaya hərbi hücumu nəticəsində baş verənləri intensiv və hərtərəfli təqdim etdiyinə, informasiya sahəsində fəallığına görə Mübariz Aslanov “Xaç Şərəfi” medalı ilə mükafatlandırılıb, ona təşəkkür ifadə edilib.

Medalı Ukrayna Müdafiə Nazirliyinin dövlət katibi Lyüdmila Daraqan təqdim edib. Dövlət katibi Ukrayna dövləti adından Baku TV və Report İnformasiya Agentliyinə xüsusi təşəkkürünü ifadə edib.

Qeyd edək ki, Mübariz Aslanov Ukraynada belə medalla mükafatlandırılan ilk xarici jurnalistdir.