"Xüsusilə bu ərazilərdə..." | Mənzil bazarında qiymətlər niyə bu qədər bahalaşıb? - Baku TV

Son zamanlar mənzil bazarında qiymətlərin artdığı müşahidə olunur.

Əmlakçıların sözlərinə görə, hazırda bazarda qiymətlər orta hesabla 10 faiz bahalaşıb.

“Keçən il Nərimanov ərazisində 210 min manata satılan mənzillərin qiyməti indi 250 mindir. Süni qiymət artımıdır, ölkədəki bahalaşma ilə əlaqəsi yoxdur”, – deyə mövzu ilə bağlı açıqlamasında makler deyib.

Əmlak eksperti Elnur Fərzəliyev bildirib ki, qiymət artımı əsasən ipoteka şərtlərinə uyğun olan mənzillərdə müşahidə edilir. Onun sözlərinə görə, sahəsi böyük olan mənzillərdə son 5 ay ərzində ciddi qiymət artımı qeydə alınmayıb.

Ekspert əlavə edib ki, şəhər daxilində aparılan abadlıq və söküntü işləri, xüsusilə köhnə və fərdi yaşayış evlərinin plana düşməsi bir çox vətəndaşların Bakıətrafı ərazilərə köçməsinə səbəb olub. Bu amil isə paytaxta yaxın qəsəbə və kəndlərdə mənzillərə tələbatı artıraraq qiymətlərin yüksəlməsinə gətirib çıxarıb.