Yanaşmalarımız çox köhnəlib | Nazir ali təhsil sistemindəki problemlərdən danışdı

“Azərbaycanlı alimlərin dünya elminə inteqrasiya olunması, həmçinin dünyanın aparıcı alimlərinin Azərbaycana gəlməsi, burada elmi tədqiqatlara cəlb olunması prioritet istiqamətdir və burada görüləcək işlər daha çoxdur”.

Bunu elm və təhsil naziri Emin Əmrullayev “Elm və ali təhsilin beynəlmiləlləşməsi” adlı tədbirdə çıxışı zamanı deyib.

Nazir bildirib ki, mövcud format və qəliblər əsaslı şəkildə dəyişməlidir:

“Biz xaricdən hansısa tədqiqatçını Azərbaycana alim və ya professor kimi dəvət ediriksə, onun bizim qaydalara uyğun olaraq prosedurlardan keçməsi çətindir. Yəni loru dildə desək, özünə hörmət edən alim bu prosedurlardan keçmək istəmir, yaxud keçmir. Əgər biz həmin alimləri Azərbaycanda görmək istəyiriksə, o zaman mövcud prosedurlara mütləq yenidən baxmalıyıq”.

Ali təhsil müəssisələri ilə yaxından işləməyə çalışdıqlarına diqqət çəkən nazir söyləyib ki, ilkin mərhələdə pilot layihə olaraq maliyyə resursları ayrılır:

“Ali təhsil müəssisələri bir çox bürokratik səbəbdən bu vəsaiti təyinatı üzrə xərcləyə bilmir. Ali təhsil sistemimizdə olan yanaşmalar həddindən artıq köhnəlib”.