Yeni dələduzluq növü ilə bağlı vətəndaşlara xəbərdarlıq

Bu günlərdə kiberdələduzlar vətəndaşların bank kartlarına dair şəxsi məlumatları ələ keçirmək üçün yeni hiylələrə əl atırlar.

Bu dəfə “Azərpoçt”un adından vətəndaşlara yalançı mesajlar göndərilir və həmin mesajlarda təhlükəli linklər də yerləşdirilir.

“Təəssüf ki, son zamanlar “Azərpoçt” adından vətəndaşlara saxta mesajların göndərilməsi halları yenidən artıb. Mesajlarda bağlamaların anbara çatdırıldığı, lakin ünvan məlumatlarının yenilənməli olduğu qeyd olunur.

Ünvan və digər məlumatları əldə etmək üçün isə saxta link göndərilir. Belə olduğu halda hətta bağlama gözləməyən vətəndaşlar belə buna aldanaraq mesajdakı linkə klikləyir, fərdi, eləcə də bank məlumatlarını daxil edərək kiberdələduzların qurbanına çevrilirlər.

Vətəndaşlardan “Azərpoçt”la bağlı şübhəli mesaj və bildirişlər aldıqda “169” Çağrı Mərkəzi, eləcə də sosial şəbəkə hesabları vasitəsilə dəqiqləşdirmə aparmalarını tövsiyə edirik”, – “Azərpoçt”dan bildirilib.

Elektron Təhlükəsizlik Xidməti də vətəndaşlara naməlum mənbələrdən daxil olan mesajlardakı keçidlərə daxil olmamağı, bank kartı və digər fərdi məlumatları qarşı tərəfə ötürməməyi, xəbərdarlıqları yalnız müvafiq qurumun özündən dəqiqləşdirməyi tövsiyə edir.